امير اَرسلان داستاني

من دئييم سيز شاد اولاسيز اودا كيم نن ؟ ديل لرده دستان اولان اميرارسلان رومي دن . صؤحبت گئدير  روم نان ميصيردن و او گون نن كي مَليكشاه رومي تاج تختين ده برقراردي و بير قاصيد ، قان تر ايچينده ، بارگاها گيرير. وزير ، وكيل ، سرلشكر و بؤيوك باشلار ييغيشيرلار و قاصيد دئيير : " فيرَنگين گمي لري دريا اوزون بولوت كيمي توتوب لار و ايندي دي كي دوشمن گيره پايتخته . ساحيل ده قتل عام واردي و بوتون روم قوشونو قانا بوله نيب. "

مَليكشاه غضبناك اولوب بير لشكر ي نن يولا چيخان كيمي ، شهرين دروازه سين ده ، بيردن بيره باش اونون و باش  پئطروس شاهين سرداري  سامي خانين. ايكي قوشون داراخ كيمي بير بير ينه گيرن كيمي ، فيرَنگ سرداري " سامي خان " آمان وئرمه دي و مَليكشاهين باشي بدن نن آيريليب گؤي ده فيرلاندي .

مملكت دوشدي فيرَنگ اَلينه و هوجوم چَح ديلر بارگاها كي خزانه ني گمي يه داشي ييب بوتون بارگاه دا نه قدر قيز گلين واردي هامي سين اسير آپارالار. مَليكشاهين ده بير خانيمي وار آدي منظر بانو و بطنين ده يئددي آيليخ بير اوشاغ. نئينه سين نئينه مه سين او قاچ ها قاش دا كؤهنه جيندير بير پالتار گي ييب بئزه يين سورمه سين سيلدي و اؤزون قاتدي كنيز كيفله ته كي بلكه بيرتَهَر جان قورتارا.  پئطروس شاهين سرداري روم حوكومتيني اَله آليب بوللي باج خراجينان برابر قيرخ اللي گؤزل سئچيب  مينديردي گمي يه كه پئطروس شاها تؤحفه يوللويا...