Orta əsrlərdə Yaxın və Orta Şərq ölkələrində, o cümlədən Azərbaycanda geniş yayılan və yatıq simli çalğı alətlər növünə aid edilən qanun keçən əsrin ikinci yarısından başlayaraq yenidən Respublikamızın musiqi həyatında öz layiqli yerini tutaraq, tez bir zamanda ifaçılar arasında geniş yayılmağa başlayır. Buna səbəb ali tədris ocaqları və kolleclərdə, musiqi məktəblərində təşkil olunan qanun siniflərində onun tədris olunması, Azərbaycan xalq çalğı alətləri orkestr və ansambllarının tərkibində geniş istifadə olunmasıdır.

Son illər bu incə və füsunkar səsli alətə gənclərimizin marağı çox artmışdır.

Ona görə də qanun alətində çalmağı öyrənmək üçün tədris vəsaitinin yazılmasına böyük ehtiyac duyulurdu. Bunu nəzərə alaraq, “Azərbaycan qanunu yatıq simli çalğı alətləri sırasında” dissertasiya işinə görə sənətşünaslıq üzrə fəlsəfə doktoru elmi dərəcəyə layiq görülən, alətin mahir ifaçısı kimi tanınan, Respublikanın əməkdar artisti, dosent Təranə Əliyevanın təqdim etdiyi “Qanun məktəbi” hesab edirəm ki, ibtidai və orta musiqi məktəbləri və eləcə də incəsənət gimnaziya şagirdləri üçün lazımlı tədris-metodiki vəsaitdir..