Əsərlərini Türk və İngilis dillərində qələmə alan Osman Türkayın (1927-2001) şeirləri Rus, Yapon, Ərəb, Özbək, Çin, Hind, İsveç, İtalyan, Tatar və s. kimi otuzdan çox dilə tərcümə olunmuş, bunlardan bəziləri kitablaşdırılmışdır. Azərbaycanda isə bu müəllifin əsərlərindən, təəssüf ki, indiyə qədər oxucular xəbərsiz qalmışdır. Bu tərcümə-uyğunlaşdırmanı etmədə məqsədimiz həmin boşluğu doldurmaq, kosmos əsri şairinin orijinal yaradıcılıq nümunələri ilə Azərbaycanlı oxucuları tanış etməkdir. Əslində Osman Türkay yaradıcılığı 2001-ci ildən bəri elmi araşdırmalarımızın mövzusudur və tədqiqatımızın nəticəsi kimi “Osman Türkayın poetik irsi” adlı kitabımız nəşr olunmuşdur. Sizlərə təqdim etdiyimiz bu kitab həmin elmi monoqrafiyanın bədii şəkildə tamamı, davamıdır.

Təbii ki, şair olmadığımız üçün əsərlərin tərcüməsinin yüksək poetik çevirmə olduğunu iddia etmirik. İndiyə qədər Türkiyə türkcəsindən Azərbaycan türkcəsinə altı uyğunlaşdırma kitabının müəllifi olsaq da, şeirlərin tərcüməsində bəzi çətinliklərlə qarşılaşdıq və orijinala sadiq qalmaq, Osman Türkay kimi özünəməxsus mövzu, üslub və dilə malik sənətkarı Azərbaycan oxucusuna daha yaxşı tanıtmaq üçün bəzi sözlərin izahını məntaltı haşiyədə verdik. Bir çox modernist şairlər kimi, Osman Türkay da durğu işarələrindən istifadə etməmişdir və biz də uyğunlaşdırma zamanı bu orijinallığı qorumağa çalışdıq...