آذربايجان شعري نين اجتماعي تنقيد بؤلومون ده گولوش تمل لي شعر لر ، اساس يئر آلير. موعاصير لردن ميرزا علي اكبر صابرو معجز شبستري ني چيخديقدا كي طنز شعرلري له يئني ليك و مدرنيته يه دوغرو ايلك آدديم لاري آتديلار ، چوخلي شاعيرلرده  بو ساحه ده يازيب يارادسالار، ايران بؤلگه سين ده اَن آدليم لاردان " كريمي مراغه اي " و " حميد آرش آزاد" اؤن سيرالاردا يئر آليرلار. بو آرادا " كريمي مراغه اي " آرتيق شؤهرت صاحيبي اولسادا، آنجاق اونون ياراديجيليقي بير پارا خصوصيت لره صاحيب دي كي اودا اونون شعر ديلي نين كوچه بازار ديلينه ياخين اولدوغو و جينسئل ليك له ايلگي لي ايما ايشاره لروكلمه لري و مضمون جهتين دن خورافاتا و عائيله مسئله لرينه بعضا يامان يوغوزلي واژه لرله توخونماسي دير. كريمي مراغه اي نين 1338- نجي گونش ايلين دن بوگونه قدَدَر ده كي 52ايل  تامام دي  طنز شعر يازير و بو مودّت ده ايسه  كيتابلاري  هئچ بير دؤولتي مانع و سانسورا اوغرامادان ،گئنيش شكل  ده چاپ اولوب ياييليب دير اونون شؤهرتينه ده بؤيوك بير سبب ساييلير. تكجه دئمك كي كريمي مراغه اي نين  بير پارا شعرلريني چيخديق دان سونرا ، اثرلري نين چوخي ادبي بديعي جهت دن اوستون بير سويّه ده يئرآلمير و ديل نظرين دن ، شعرلري آذربابجان ادبي ديلي يوخ بلكه مراغا لهجه سينه دايانان بير اؤزَل لي يه ماليك دير.