Azərbaycan Aşıqlar Birliyi 2012-ci ildə yeni bir layihəyə start verdi – “Ustad aşıqlarımız” seriyasından kitabların nəşrinə başladıq. Bu seriyadan ilk kitab Azərbaycan aşıq sənətinin ən böyük nümayəndəsi, ustadlar ustadı Aşıq Ələsgərə həsr olundu. Bu layihə çərçivəsində ustad aşıqlarımızın hər biri haqqında ayrıca kitab nəşr etdirməyi nəzərdə tutmuşuq.

“Ustad aşıqlarımız” seriyasından ikinci kitabın Aşıq Kamandara həsr olunması da təsadüfi deyil. Bu il XX əsr Azərbaycan aşıq sənətinin ən görkəmli nümayəndələrindən olan ölməz ustadın anadan olmasının 80 illik yubiley ilidir.

Aşıq Kamandar! Bu ad 60 ildən çoxdur ki, bizim müqəddəs Azərbaycanımızı, Türk dünyasını, Anadolunu, Cənubi Azərbaycanı, bütün Şərq dünyasını dolaşan çox şərəfli bir addır.

Kamandar istər klassik səviyyədə, istər müasir səviyyədə aşıq sənətinin elə bir nümayəndəsi idi ki, hamı ondan öyrənmək istəyirdi, çünki ondan öyrənməli şeylər çox idi, sənətkar kimi çox yüksəkdə, çox ucada duran şəxsiyyət idi.