آهولار و یاهولار - علیرضا ذیحق -əlirza zihəq- ahular yahular

آی اوشاقلار صمد عمی گلمه دی

قالخان لا قیلینجی ا ولما سایدی دا،کور اوغلو تک بوغلارینی ائشمه سه یدی ده،قارا بوغو واوجا بوی بوخونو ایله،ائشیتدی ییمیز هر بیر ناغیلین قهرمانی کیمی ایدی.گاهدان اونو  شاه اسماعیل تک عرب زنگی نین قاباغیندا گؤروردوک گاهدان دا عصیان ائدیب  " هجر " خانیمی بوزآت بئلینده اوجا داغلارا قاچیردان، قوچاقلار قوچاقی نبی ایدی.هردن ده بابک ایدی بیزلر ایسه  دوُیوشجول دلی لری. توپ اوینا ییب ییخیلار کن هئچ یاراسینی باغلامازدی و قان آخمایا گوز اوجونان باخمادان یاراسینا دوز سپه ن ملیک محمد ین لاپ اوزوایدی. دئیه ردی:  « وئردی یی سوزو توتوب بیر تک قیزیل آلما اوچون گئجه نی آییق قالیب سحره جان یاتمایان ملیک محمدی هئچ واخت اونودمایین. »

بیزلر اونا آغا معلیم یوخ صمد عمی دئیه ر دیک .اونون  کیتاب دولو چانتاسی  و محبت دولو اوره یی له گولر اوزو ،سئحیر لی بیر دونیا کیمی ایدی.

کبلاسا گیریب چانتانی آچدیقدا،سانکی  نور سپی لردی  وخیال دونیامیز مین رنگ ایله بویاناردی. ائله بیر حیات گوره ر دیک کی اوردا، مین دوست آداما آزایدی ودوشمه نین تکجه بیری، چوخدان چوخ.باغچا لار دا ساز وار ایدی گوزل لرده ناز.قیز لار تئلی هورمه ایدی ای ییت لر بیله گی سینماز.بیردن گوره ر دیک گئجه ایله گوندوز قاریشدی و  آی اولدوز گوی دن ائنه رک ،گوی قورشاق لاری بیزه کوف اولوب گونشه دوغرو بویلا نیریق.

بیز کند ده یاشاساق داصمد عمی بیزه شهر دن ده سوز آچاردی.او بیزه ناز نازی بویوین و اوزلریندن باشقا کیمسه نی به ین مه ین بیر پارا وارلی دوولتی لردن دئسه ده  لب لبی ساتان "لطیف " دن دانیشیب باشماقی اولمادان،اوتانماسین دئیه او  قارا رنگ ایله آیاقلارینی بویایان گونلردن سوز آچاردی وبیر توکانین ویترینینده ، گوروب سئودیگی وحسرتله باخیب آلانمادیقی توفنگ دن دئیه ردی..