رحمتلی اوستاد آلاو ون 90 یاشی مناسبتی ایله  بیر نشر اولونمامیش اثری

آلاو سؤزلوگو(احمد شایا)

ادبی دوستلاریمدان اولان اوستاد محمد علی نقابی نین قوللوغوندا اولدوغوم بیر گون او ، رحمتلی احمد شایا یا همان « ـآلاو» جنابلاریندان گئتدیکده ، او مرحومون بیر الیازما سوزلویوندن ده سوز – صحبت گئتدی . اوستاد نقابی نین بویوردوقلارینا اساس ، او داهی هله دیری کن او سوزلویون تبریز اوستاد لاریندان اولان رسول آقا فتحی مجده وئریب و اوندان بو سوزلویون نئجه دئییرلر رئداک اولونماسین ایسته میشدیر . تاسف له اوستاد رسول آقا فتحی مجد بو ایشی بیتیره بیلمه دیکینه گوره او فیش لره آلما صاندیغیندا !! اوستاد نقابی یه تاپیشیریلمیشلار . اوستاد نقابی ایسه ایشه باشلایاندا ، ایشین چتین اولدوغون دویوب ، رحمتلی اوستاد آلاودان دا یاردیم ایسته یر . آنجاق بوگون – صاباح بیر زمان سورونور . و نهایت اوستاد آلاو دونیاسین دگیشیر . اوستاد نقابی او مرحومون عائله سینه مکتوب یازیب ، بو کیمی قیمت لی بیر اثرین اونون یانیندا یا همان آرشیوینده امانت اولماسین بیلدیریر . تاسف له اونون عائله سی قاباغا یئری مه ییب و او ارزیش لی فیش لر ائله او تهر قالیر کی قالیر !!

دئدییم کیمی او گوروشوموزده من اوستاد نقابی دن خواهش ائتدیم کی بو فیش لر امانت اولاراق بیزه وئریب تا اونلار اسکن اولونسونلار . اوستاد منیم بو ایسته یمی قبول ائدیب و نهایت بیر سیراسی آلما صاندیغیندا ، بیر سیرا سی ایسه دوگو تایلاریندا اولان همین فیش لر بیزیم آرشیوه انتقال تاپدی لار . بیر دوست لا دانیشیب اونلارین رغبت لرین بو ایشه گوره بیلیب و همین باغلی لار امانت اولاراق اونلارا تقدیم اولوندو کی اسکن اولونوب ماراقلانان لارین الینه یئتسین لر . تاسف له 4-5 آی قالدیقدا او دوستوموزون دا الیندن بیر ایش گلمه دی کی گلمه دی ! بو دونه اورمودا یاشایان فاضل دوستوم علی آقا ولی زاده بیزه قوناق اولارکن بو غملی قضیه دن سوز آچدیم . اونلار کونوللو اولاراق بو ایشی بویونلارینا آلمالارینا سوز وئردی لر . و فیش لره اورمویا انتقال تاپدی لار و چوخ سئوینیرم کی بو گون اونلار آز بیر زاماندا اورمو دوست لاریمیزین واسطه سی ایله تمامی ایله اسکن اولونوب بو گون دیرلی توروز سایتی واسطه سی ایله ماراقلانلانلارین اختیاریندا قویولور . بو دیرلی سوزلویون اوخوماغینا باشلامادان بو  کیتابین ترتیب وئرنین ده بیر نئچه سطیرده تانیماق  داها یئرلی اولاجاق .

دوز 90 ایل بوندان اوّل یا  1304 ینجی ایلینین آذر آیی نین سون گونلرینده تاریخ لرده « دارالصفا » آدلانان خوی شهرینین علی اصغر آدلی بیر عائله سینده احمد آدلی بیر اوشاق ایشیق دونیایا گوز آچیر . او بیر زامان خوی دا اودوقدان سونرا ادبی – اجتماعی ایش لرینه خویو بیر او قدر اویغون بیلمه ییب تبریزه کوچور . بو اوجسوز – بوجاقسیز شهرده اونون گوزو داها آچیلیر و یارادیجیلیغین باشلاییر . سونرا او تهرانا کوچوب عومرونون سونونا دک بو شهرده یاشاما مجبوریتینده اولوب ، هردن اوره یی ایسته دیی آذربایجانه دا باش چکیر .  79 ایل عومور گون سورن و 60 ایل هنده ورینده ادبیاتیمیز قوللوغوندا اولان اوستاد آلاو 1383 ینجی ایلین مهر آیی نین 23 اونجو گونو دونیاسین دگیشیب تورپاغا گئدیر . اونون اثرلرین بئله سیرالاماق اولار :

1-    حیدربابادان شهریارا مکتوبلار (پوئما)- ۱۳۳۳- نشر اورین، تبریز، ۱۳۵۷

   2-  در بــاره مـــولانا و فضــــولی- ۱۳۳۹، چاپ ایچون حاضر

   3-  مصلوبین مشهور از صدر اسلام تا انقلاب مشروطه ایران (پایان نامه)- چاپ دانشگاه تبریز، ۱۳۴۳

   4- بابـک منظومه سی (پوئما)- ۱۳۴۵، نشراورین، تبریز، ۱۳۵۷

   5- آیسیزگئجه لر( شعرمجموعه سی) ۱۳۴۵، نشر اورین، تبریز، ۱۳۵۸

   6- دومانلی گونلر( شعر مجموعه سی) نشر اورین، تبریز، ۱۳۵۹

 7-   گونشلی سحر( شعرمجموعه سی) ۱۳۵۷، نشر اورین، تبریز، ۱۳۶۰

  8-  رستنـــی های داروئـــی در پزشکــــی معاصر (ترجمه) «ی – دمیر اوف ، ج شکروف »۱۳۶۰ نشر گوتنبرگ، ۱۳۶۸

 9-   خواجه محمد نصیرالدین طوسی( ترجمه) اثر: «حبیب محمد بیگلی»۱۳۷۰- چاپ ایچون حاضر

 10-   آذربایجان ـ ائرمنستان محاربه سی حاقیندا دوشونجه لریم و گونده لیک‌لریم (مجموعه مقاله ) ۱۳۷۷ – چاپ ایچون حاضر

   11- از جبهه به جبهه (رمان )- ترجمه.  اثر (حسن سید به یلی)  ۱۳۸۰ – چاپ ایچون حاضر

 12-   شعر و شاعر، ادبی تنقیدی آراشدیرمالار اوچ جیلد، مولف ۱۳۸۰- چاپ ایچون حاضر

   13- قـــادینلار شه‌هری (پوئما ) مؤلف ۱۳۸۰- چاپ ایچون حاضر

14-    اومیــــد سرداری ( پـوئما) مؤلف ۱۳۸۰- چاپ ایچون حاضر

  15-  فضـــولی شعرلرینه تضمین مؤلف ۱۳۸۱ – چاپ ایچون حاضر

  16-  فرهنگ واصطلاحات الکترو تکنیک (آذربا یجانی ـ فارسی) ترجمه  –۱۳۸۱ چاپ ایچون حاضر

  17-  آسترونومییا تئرمینلری ( فرهنگ نجوم ) انگلیسی–آذربایجان فارسی ترجمه ۱۳۸۱- چاپ ایچون حاضر

  18-  شبهای مهتابی ــ (رمان ) ترجمه،  اثر:  الیاس افندیئو  ۱۳۸۲ – چاپ ایچون حاضر

  19-  معاصر آذربایجان ادبی دیلینین اومونیملر لغتی – ترجمه، اثر حسرت علی اوغلو حسنوف ۱۳۸۲ – چاپ ایچون حاضر

 20-   آذربایجانی ـ فارسی لغت (۸۴۰۰۰) دن آرتیق لغت و اصطلاح ۱۳۵۷ـ ۱۳۸۰- چاپ ایچون حاضر

  21-  آذربایجان دیلینین فونوتیکاسی، ترجمه، اثر:آغاموسی  آخوندوو  ۱۳۸۳

  22-  یئدی دفتر شعـــر مجمـــوعه ســـی ۱۳۵۷ ـ ۱۳۸۳ – چاپ ایچون حاضر

  23-  یکدسته گل هدیه به دوستان ۱۳۵۷ ــ۱۳۸۳  (  فارسیجا شعرلر)  نشر افلاک ۱۳۸۴

ایندی من اوزومو بختور بیریسی بیلیرم کی ده بو قیمتلی سوزلویون گون ایشیغینا چیخماسیندا منیم ده کیچیک اولموشسا پاییم اولموشدور .

سئوگی لریم له – تبریز – رضا همراز

20/7/94

کیتابلارین لیستین یازمادا بو مقاله دن فایدالانمیشام :

1- احمد شایا (آلاو) آذربایجان مفتونو و اینسانلیق وورغونو / ائلدار موغانلی