Şəftəli Qoxusu - Azər Abdulla

شفتلی قوخوسو -  آذر عبدالله

دوققوز ياشلي بالاجا بو دفعه تك-تنها يولا دوشوب ائولريندن بئش كيلومئتر آراليدا اولان تئي كندينه گئدنده قارشيلاشاجاغي ايتين، قوردون، آيينين، ايلانين قورخوسوندان چوخ، ايكي شئي اونون گؤزونه دوروردو. بير، ياز واختي قان-قان دئين ميغري چايينين اوستوندن كؤرپو عوضينه يان-يانا اوزاديلميش اَيري-اويرو، يئرينده اوينايان بير جوت سوروشكن آغاجين اوستوندن كئچمك، بير ده چايي كئچيب ايييرمي-اوتوز آدديم گئدندن سونرا باشلاييب، بيتيب- توكنمه يه نله مه دولاما سرت يوخوش.
بالاجا اَيري-اويرو آغاجلارين اوستوندن قاباقلار آناسييلا بير نئچه دفعه كئچميشدي، اورايا چاتجاق يئنه آياغيني آغاجين اوجونا داياييب گوج وئردي، يئرينده دينگيلدمه سيني، اويناييب-اويناماديغيني يوخلادي. سو قالخيب هردن شومال، پاريلدايان آغاجلارا ديير، اونلاري يئريندن اويناديردي.
هر دفعه تئي كندينه گئدنده، آناسينين دؤنه-دؤنه دئديگي "كؤرپونو كئچنده احتياطلي اول. چايا باخما، گؤزون آخار." سؤزلريني خاطيرلادي..