Aləmlərin Rəbbi olan Uca Allaha sonsuz həmdu-sənalar olsun. Aləmlərə rəhmət olaraq göndərdiyi və Xatəmul-Ənbiya olan Rəsulu-Əkrəm əfəndimiz Muhəmməd Sallallahu Əleyhi və Səlləmə və onun ali-əshabına da salat və salam olsun .

Qurani-Kərim, Allahu Təalanın aləmlərə göndərdiyi son kitabdır. Bu müqəddəs kitabın oxunub başa düşülməsi və ən əsası da onunla əməl edilməsi, Allahın bir əmridir. Son Peyğəmbər olan Muhəmməd Sallallahu Əleyhi və Səlləmə nazil olan Qurani Kərim, 23 il ərzində nazil olmuş və Ərəb dilinin mükəmməl bəlağatını və məna zənginliyini özündə əks etdirir. Əlbəttə ki, Peyğəmbər əfəndimizin ən böyük möcüzəsi, məhz Qurani Kərimdir. Quran, dildəki sözlərdən ən həssas, təsir gücü ən çox və fəsahəti ən qüvvətli olanını seçər. Qurani-Kərim nə şeir, nə də nəsrdir. Əksinə, həm şeirin, həm də nəsrin xüsusiyyətlərini özündə cəmləşdirən misilsiz bir üsluba sahibdir.

Qurani-Kərim, mövcud olan ədəbi janrlardan fərqli və ancaq özünəməxsus bir üsluba sahibdir. Eyni zamanda Quranda, bütün ədəbi janr və növlərin ən mükəmməl elementləri ilə rastlaşmaq mümkündür. Qissə, dini öyüd-nəsihət, tarix, qanunlar, döyüşlər, axirət, cənnət və cəhənnəm kimi mövzuları, fəsahət və bəlağət yönündən ən yüksək səviyyədə ifadə edir…